- Sjálvt um tú kanska ikki hevur royndir á einum øki og ivast í, um hetta man vera nakað, tú megnar, so skalt tú siga ja, tá ið tú fært ein møguleika í boði, sigur Turið Finnbogadóttir Arge, og heldur fram, at hetta jú er eitt tekin um, at onkur trýr uppá, at tú kanst lyfta hesa uppgávuna.

Turið byrjaði í bankanum í 2007 og hevur arbeitt á fleiri ymsum deildum, áðrenn hon setti seg í stjórasessin saman við Árna Ellefsen fyri umleið einum ári síðani.

- Tað er ein fyrimunur at hava verið runt í fyritøkuni, soleiðis at eg bæði skilji, hvat kundar okkara halda og vilja hava, men eisini at mann hevur arbeitt á stápsdeildum, sum stuðla undir, soleiðis at kundadeildirnar kunnu gera tað, tær skulu. Tað er gott at hava eina fatan av, hvussu hesi øki skulu samstarva fyri at fáa eina optimala eind.

Um tað at vera fyrsti kvinnuligi bankastjóri í Føroyum sigur Turið, at tað er ein avbjóðing fyri fíggjargeiran sum heild, at fáar kvinnur eru í ovastu leiðsluni.

- Tosað hevur verið um hetta í longri tíð, men enn sær man ikki ta stóru broytingina. Tó eru vit nakað frammanfyri í Føroyum, tí bæði í Banknordik og hjá okkara stóra kappingarneyta er støðan javnari, tá ið tað snýr seg um leiðandi størv, so har er føroyski fíggjargeirin munandi framman fyri onnur.