Tað heldur Gitte Klein, sálarfrøðingur og serfrøðingur í evninum børn og miðlar.

- Vit hava alla tíðina havt hetta framtíðarperspektivið, har vit hava lullað okkum eitt sindur í svøvn av, at tað er neyðugt at hava tøknina við okkum alla tíðina. Tøknin er fantastisk til nógv, men tøknifyritøkurnar hava eisini sagt okkum, at vit hvørki kunnu skipa skúla ella framtíð hjá børnum uttan tøkni.

Norðurlandaráðharraráðið hevur biðið um eina frágreiðing frá Nordisk Tænketank fyri KT og fólkræði, tí tey vilja hava nøkur tilmæli, sum kunnu vera við til at verja góða tónan í almennu samrøðuni á netinum.

Eitt av teirra tilmælum í hesum sambandi er, at mørk eiga at vera bygd inn í sosialu miðlarnar, soleiðis at børn bara sleppa at vera har í avmarkaða tíð.

Sjálvt um tankin er góður, skal arbeiðast meira við hesum, heldur Gitte.

- Um tað nú verður bygt inn í TikTok, Youtube, Snapchat og onnur, at børn bert sleppa at vera har í ein tíma, so eru tað nógvir tímar tilsamans, so uttan samstarv millum miðlarnar, er ikki so nógv vunnið, leggur hon afturat.