- Vit skulu brúka løgtingskvinna og landsstýriskvinna, men vit noyðast ikki at broyta tað við lóg, heldur Jógvan á Lakjuni, fyrrverandi løgtingsformaður.

Hann heldur eisini, at kallkynsorðingar eiga at verða brúktar fyri bæði kyn, tí tað hava tær altíð verið.

Bjørk Maria Kunoy, forkvinna í javnstøðunevndini, er ósamd. Hon heldur, at málið skal fevna um bæði kyn.

- Lógin skal avspegla samfelagið, og tí er neyðugt at broyta lógir eftir samfelagnum, vit liva í, hóast søga og siðvenja hava verið eitt annað, sigur hon.

Løgtingið hevur við aðru viðgerð samtykt uppskotini frá formansskapinum í løgtinginum um starvsheiti í løgtinginum og landsstýrinum.

Tað merkir, at heitini løgtingsmaður, løgtingskvinna og løgtingsfólk verða javnsett og góðkend at nýta formliga, eins og landsstýriskvinna og landsstýrisfólk verður javnsett við landsstýrismann, løgtingsforkvinna við løgtingsformann, og løgkvinna við løgmann.

Samstundis verða løgtingsfólk og tingfólk sett inn í tingskipanina og stýrisskipanarlógina sum felagsheiti fyri kvinnur og menn, ið sita í løgtinginum.

Áðrenn uppskotið varð skrivað, bleiv javnstøðunevndin hoyrd, og tey halda, at tað hevur týdning, at kvinnur kunnu hava heitið løgtings-, landsstýris- og løgkvinna.

Jógvan á Lakjuni heldur hinvegin, at um mann broytir heitini, so pilkar mann við nakað so grundleggjandi og vanvirðir orðið løgmaður til dømis.