Alsamt færri limir í fólkakirkjuni

Prosentparturin av føroyskum borgarum, sum eru limir í fólkakirkjuni, er minkaður støðugt seinastu árini, og nýggjastu tølini frá Hagstovuni, sum eru dagførd í gjár, siga, at nú eru 77 prosent av fólkatalinum í Føroyum limir í fólkakirkjuni. 

Í fjør var talið av limum 78,1 prosent. Fyri tíggju árum síðan var tað 82,1 prosent, og fyri 20 árum síðan var tað 83,8 prosent.

Hóast prosenttalið er í støðugari minking, so hevur stóri fólkavøksturin seinastu árini gjørt, at reella talið av limum í fólkakirkjuni er vaksið hvørt ár frá 2015 til 2022. Men eisini tað talið er nú minkandi.

Tí í 2022 vóru sambært Hagstovuni 41.827 limir í føroysku fólkakirkjuni, men 17. mai í 2023 vóru 41.729 limir - 98 færri enn fyri einum ári síðan.