Nýggj ríðibreyt - nýggir møguleikar

Ross og reiðfólk vóru í góðum hýri leygardagin, tá nýggja ríðibreytin í Havnadali varð tikin í nýtslu.

 - Vit væntaðu at verða liðug í fjør, men tað varð útsett eitt sindur. Nú er hon endiliga liðug, sigur Sedea B. Nolsø, forkvinna í Føroyskum Íslandsrossafelag.

Hetta var í tøkum tíma, sigur føroyski norðurlandameistarin í Gæðingarkeppni, Knút Lützen, tí gamla breytin var gomul og í ringum standi.

 - Hon var blivin øgiliga hørð fyri beini á rossunum, og beini á rossunum eru tað týdningamesta. Tað eru nøkur ár síðan vit byrjaðu at spæla okkum við tankan um at fáa eina nýggja ríðibreyt, sigur hann.


Nýggir møguleikar

Føroysk reiðfólk hava fingið góð úrslit í altjóða kappingum, hóast venjingarumstøðurnar ikki hava verið nøktandi. 

Tað eru tær nú, og tað fer at hava stóran týdning fyri føroyska ríðing komandi árini, sum nú kunnu venja á teimum breytum, sum tey skulu kappast á uttanlands.