Arbeiða við at útflyta føroysk ross

Skal føroyska rossinum vera lív lagað, skal tað kunna útflytast, tí so fá fólk í Føroyum vilja hava føroysk ross.

Heilsufrøðiliga starvsstovan er farin undir at fyrireika neyðugu lógarbroytingarnar, so rossini kunnu útflytast, men talan er um rúgvusmikið arbeiði, sum væntandi fer at taka drúgva tíð. 

Tað sigur Høgni Hoydal, landsstýrismaður, í svari til Jóhannis Joensen, løgtingsmann.

Høgni Hoydal sigur, at ikki ber til at siga meira neyvt, nær tað fer at bera til at útflyta føroysk ross.

Í løtuni eru færri enn 100 føroysk ross. 

Sambært FAO, stovninum hjá ST, sum umsitur mat og landbúnað, skulu aliryssurnar vera fleiri enn 1000, skal stovnurin ikki vera hóttur.

Høgni Hoydal sigur, at skal føroyska rossaslagnum vera lív lagað, skulu fleiri átøk gerast. Útflutningur er eitt átak.