Lítil ampi av sólorkuverkinum hjá Luna

Umhvørvisstovan hevur góðkent umhvørvisárinsmetingina hjá sólarorkuverkinum hjá Luna á Fútakletti.

Sólorkuverkið, sum er 6.000 sólpanel, 15.000 fermetrar, er á tekjuni á smoltstøðini hjá Luna.

Sambært elveitingarlógini skal umhvørvisárinsmeting gerast og góðkennast, áðrenn loyvi til at gera ravmagn verður givið.

Lítil ampi

Útrokningarnar í umhvørvisárinsmetingini vísa, at sannlíkindi fyri ampum av endurskini í bústaðarøkjum og á vegum er lítil. 

Og endurskin er ikki til ampa fyri innflúgving til flogvøllin í Vágum. 

Kanningar benda á, at vandin fyri samanbresti hjá fugli er lítil. Endurskinið kann fáa fugl at halda, at sólpanelini eru vatn. 

Men sólpanelini eru viðgjørd, so endurskinið minkar.

Streymur til 300 húsarhald

Sólorkuverkið hjá Luna kann gera 1,3 milliónir kilowatttímar av streymi um árið.

Teir svara til miðalársnýtsluna hjá okkurt um 300 húsarhaldum. 

Góðkenningin kann kærast, og freistin er til 14.juni.