Hagtøl eru ikki bara turr tøl, sum síggjast í tjúkkum rapportum, sum eingin hyggur at. Nei, tey verða nýtt nógvastaðni í samfelagnum til at siga okkum, hvussu gongur, og hvussu vit hava tað, men tað kann vera trupult at greiða frá hagtølum, tí tey eru ikki altíð so løtt at lesa.

Tað er ábyrgdin hjá Hagstovu Føroya at fáa hagtølini, sum tey hava fingið til vega, út til fólkið, og tað gera tey á ymsan hátt, soleiðis at tey vera lættari atkomulig.

- Ofta leggja vit okkum upp at aktuellum hendingum í Føroyum, fyri at fáa fólk áhugaði í teimum hagtølum sum vit hava. Til dømis tá landsdystir ella merkisdagar eru, sigur Kári Holm Johannesen, leiðari á hagdeildini hjá Hagstovuni, og Marita Klein Joensen gevur honum rætt.

- Eingin byrjar sum serfrøðingur, tá tað snýr seg um hagtøl, so vit royna at miðla okkara hagtøl bæði til børn og til vanligar føroyingar, og tí er týdningarmikið, at tilfarið, vit leggja út, er áhugavert. Soleiðis at vit klára at fanga føroyingar, meðan teir skrolla á Facebook.