Helvtin av stuðlinum fer til fólk á alivirkjum og uppsjóvarvirkjum

Stívliga helvtin av tí, sum fer úr fiskavirkisskipanini, fer til fólk, sum arbeiða á alivirkjum ella uppsjóvarvirkjum.

Starvsfólk á alivirkjum og uppsjóvarvirkjum fingu 120,4 mió, kr. úr fiskavirkisskipanini hjá ALS árini 2012 til 2022.

Higartil í ár hava tey fingið stívar níggju milliónir haðani.

Tá eru eftirløn og almenn gjøld ikki tald við. 

Hetta er 53 prosent av tí, sum farið er úr fiskavirkisskipanini hesi 11 árini.

Tað upplýsir Ingilín D. Strøm, landsstýriskvinna, í svari til Liljuna Weihe, løgtingskvinnu.

Broytingar verða gjørdar

Stýrið hjá ALS hevur eftirmett fiskavirkisskipanina.

Broytingar eru gjørdar í kunngerðini um útgjald til arbeiðsleys á fiskavirkjum.

Tær eru til hoyringar í løtuni.

Uppskotið er, at arbeiðsleys á fiskavirkjum skjótari kunnu koma í vanligu arbeiðsloysisskipanina og tí fáa størri útgjald og vera tøk til onnur størv.

Men semja er ikki í ALS-stýrinum, um alivirki og uppisjóvarvirki framvegis skulu vera í fiskavirkisskipanini.

Tí er einki tilmæli komið til landsstýriskvinnuna um at gera broytingar hesum viðvíkjandi, sigur Ingilín D. Strøm, landsstýriskvinna.