Helst var tað ein video á You Tube um tað at ganga berføttur, sum vakti mín ahuga, sigur Petur Martin Johannesen.

Hann hevur gingið nógv berføttur síðstu tvey árini. Bæði í Føroyum og uttanlands.

Um vikuskiftið var ein drúgvur túrur á skránni. Petur Martin setti sær fyri at ganga Suðuroynna á tamb.

Fyrra helvt av ferðini var ein dreymagonga. Alt gekk sum tað skuldi.

Tíverri traðkaði hann á eitt gamalt stikpetti á leiðini oman av Valdaskarði og fekk eitt lítið bløðandi sár.

Teinurin úr Vági til Lopra var gingin saman vid øðrum eftir vegnum. Tað fór illa við iljunum, og eisini bleiv nakað kalt at ganga berur seinasta pettið.

Petur Martin Johannesen kom tó á mál. Í alt tók túrurin tíggju og ein hálvan tíma.