Svarar fyrispurningi um Sernám í tinginum

Ger Sernám mismun?

Hesum spurningi frá Bárði á Lakjuni, tingmanni, skal landsstýrismaðurin í barna- og útbúgvingarmálum, Djóni Nolsøe Joensen, svara í dag.

Tingmaðurin spurdi annars í vár landsstýrismannin um ógreiðu um málmenningartilboð frá Sernámi til børn við Down Syndromi.

Í svarinum tá segði landsstýrismaðurin, at øll foreldur at børnum undir 18 ár við Down syndromi hava fingið - og fáa - hjálp og vegleiðing.

Bárður á Lakjuni

Bárður á Lakjuni, løgtingsmaður, hevur aftur spurt um Sernám. (Mynd: Bjarni Árting Rubeksen)

Hetta fær spyrjarin ikki at sampakka við tað, sum fleiri mammur alment hava sagt.  Tí fleiri mammur hava sagt, at Sernám ger mun á tilboðnum til børn við Down syndromi.

Hetta heldur spyrjarin vera álvarsamt, og sigur tað stríða beint í móti tí, sum stjórin á Sernámi alment hevur ført fram feiri ferðir, og sum landsstýrismaðurin eisini førdi fram í svarinum upp á §52a fyrispurningin í vár.

Djóni Nolsøe Joensen

Djóni Nolsøe Joensen, landsstýrismaður í barna- og útbúgvingarmálum, skal svara í tinginum í dag. 

Foreldur løgd undir at siga ósatt

Spyrjarin undrast á, at útsagnirnar og veruleikin eru so ymisk, og heldur, at í roynd og veru kann sigast, at við útsagnunum hjá leiðaranum á Sernámi og landsstýrismanninum, verða foreldrini løgd undir at siga ósatt.

Hann spyr tí landsstýrismannin í grein 53 fyrispurningi millum annað, um Sernám ger mismun, um landsstýrismaðurin kann veita trygd fyri, at øll fáa ta hjálp og vegleiðing, tey hava rætt til og tørv á, og um landsstýrismaðurin heldur, at tey foreldur, ið siga seg ikki hava fingið nøktandi hjálp og vegleiðing, siga ósatt?

Tingmaðurin er ikki nøgdur við svarið, hann fekk í vár, og spyr tí umaftur, sum hann kann sambært grein 53 í tingskipanini.

Djóni Nolsøe Joensen skal svara á tingfundinum fyrrapartin.