Ein lívsmennari hjálpir tær við at røkka málum í lívinum við vegleiðing,amboðum, vitan og leiðmenning.

Vit kunnu kenna okkum strongd, onkuntíð hava vit eina neiliga rødd í høvdinum, og so duga vit ikki altíð at ráðgeva okkum sjálvi, tá ið tørvur er á tí. Tá kann tað vera gott við einum lívsmennara, ið fær hjálpt tær við tí, sum tú ikki helt, at tú fór at megna.

- Tað er rættiliga breitt at vera lívsmennari, tí har er nógv at bata um og hjálpa við, sigur Heini Weihe, ið hevur fingist við hesum síðani 2018.

Hann heldur, at tað er umráðandi, at vit leita okkum hjálp hjá einum lívsmennara, tá ið vit sjálvi ikki duga at síggja, hvat tað er, sum bagir.

- Ein lívsmennari hyggur at tínum gerandisdegi og roynir saman við tær at finna útav, hvat tildømis gevur tær strongd ella ger teg ónøgda/n.

Av tí, at vit menniskju hava lyndi til, at seta fokus á tað neiliga, er tað umráðandi, at fáa tað jaliga fram, og liva við yvirskoti. Hetta er nakað av tí, sum hann hjálpir við.

Heini leggur afturat, at hann heldur, at skúlar og arbeiðspláss áttu at fingist meira við "life coach" økið,  soleiðis at sálarheilsan kann fylgja við, og vit læra tíðliga, hvørji armboð vit skulu nýta, tá ið tosað verður um strongd, forðingar, dreymar í lívinum, veikleikar og virðir.