Fær nú heimild at seta tiltøk í verk

Løgtingið hevur endaliga samtykt uppskotið frá landsstýrinum, um at ikki er neyðugt at fara í løgtingið við tiltøkum móti Russlandi og Hvítarusslandi.

Landsstýrismaðurin í uttanríkis- og vinnumálum fær heimild at seta tiltøk í verk við kunngerð.

Við triðju viðgerð var lógin samtykt við 14 atkvøðum fyri og níggju ímóti.

Eitt uppskot um at beina málið aftur í nevnd, fall.

Tvey broytingaruppskot frá Sambandsflokkinum og Fólkaflokkinum fullu eisini.

Sambandsflokkurin og Fólkaflokkurin skutu m.a. upp, at ætlar landsstýrið at seta í verk tiltøk, sum avmarka fiskivinnuavtalur við onnur lond, ella avmarka avtalur um útflutning av fiskavørum og matvørum, skal heimildin útvegast í serstakari løgtingslóg.

Hesi bæði uppskotini fingu níggju atkvøður, 14 atkvøddu ímóti, og tey fullu sostatt.

Høgni Hoydal, landsstýrismaður í uttanríkis- og vinnumálum, segði við útvarpið á middegi, at ætlanin er at seta tiltøk móti Russlandi í verk, tá komið er inn í juli mánað, men fyrst verður ráðførsla við uttanlandsnevndina um tiltøkini, sigur Høgni Hoydal.