SEV kann missa vatnið

5. oktober fer 50 ára gamla kunngerðin úr gildi, sum gevur SEV heimild at brúka vatnið í Føroyum til orkuframleiðslu.

Men hóast bert nakrir dagar eru til gamla kunngerðin fer úr gildi, so er enn ógreitt, um SEV skal hava sama rættin næstu 50 árini, ella um onnur skulu sleppa at bjóða seg fram at røkja partar av vatnorkuframleiðsluni fyri SEV ella í kapping við SEV.

Ein nýggj kunngerð er í løtuni til viðgerðar hjá Elveitingareftirlitinum. Sambært Elveitingareftirlitinum er tó ivasamt, um nýggja kunngerðin er liðugt viðgjørd 5. oktober. Er hon ikki liðugt viðgjørd, verður 50 ára gamla kunngerðin helst longd.

Johan Dahl, landsstýrismaður vil einki siga um málið, so leingi kunngerðin er til viðgerðar í Elveitingareftirlitinum.

“Áðrenn eg havi fingið teirra tilmæli, kann eg einki siga”, sigur Johan Dahl í stuttari viðmerking.