Samtakið Christian í Grótinum keypt 42 prosent av orkufelagnum Magn

Ætlanirnar hjá samtakinum Christiani í Grótinum í Klaksvík um at keypa seg inn í orkufelagið Magn, eru nú veruleiki.

Kappingareftirlitið nú hevur góðkent, at samtakið keypir seg inn í orkufelagið. 

Upprunaliga ætlaði Chistian í Grótinum at keypa meirilutan í Magn, men tað er endað við, at samtakið keypir 42 prosent av partabrøvunum.

Við hesum stóra ognarluti er nú samlaði meirilutin av partabrøvunum í felagnum aftur á føroyskum hondum. 

Jan Petersen er stjóri í Christian í Grótinum-samtakinum. 

Jan Petersen

Long tilgongd

Ætlanin hjá Christian í Grótinum-samtakinum at keypa meirilutan í Orkufelagnum, sum eigur Magn, fór í fyrsta umfari fyri bakka.

Samtakið bjóðaði í oktober í fjør teimum báðum íslendsku fyritøkunum, Skel og Hólmi, 170 milliónir krónur fyri tey 56 prosentini av partabrøvunum, sum tey áttu í Orkufelagnum.

Men tá ið ein av partaeigarunum í januar í ár kom við eini stevning, sum hevði við forkeypsrættin at gera, slepti Christian Grótinum-samtakinum keypsætlanini. 

Nú hevur  samtakið Christian í Grótinum í staðin keypt 42 prosent av Magni.