Tórshavnar Havn merkir enn ikki avleiðingarnar av grindadrápi

Nógv ferðafólk umborð á cruise-skipinum Ambition vórðu illa við, tá ein grind varð hildin til í Sandagerði, samstundis sum skipið lá við bryggju í Havn tann 9. juli í ár.

Tað førdi til, at reiðaríið Ambassador Cruise Line gav sínum ferðafólkum eina umbering, og tað førdi eisini til eina almenna undirskriftsinnsavnan á netinum, har heitt verður á føroyingar um at gevast við grindadrápi.

Í løtuni hava meir enn 386.000 fólk skrivað undir áheitanina.

Tórshavnar Havn hevur enn ikki merkt avleiðingarnar av grindadrápinum 9. juli, sigur Hanus Mikkelsen, havnarmeistari. Hann avsannar tó ikki, at avleiðingar kunnu koma seinni.

Brandur Højgaard, havnarmeistari í Runavíkar Havn, sigur, at tey í ár ikki hava fingið nakrar avlýsingar ella fyrispurningar annars í sambandi við grindadráp.

Seinastu árini er cruise-virksemið í Runavíkar Havn vaksið nógv, og 14 útlendsk cruiseskip aftrat skulu eftir ætlan koma á Runavík í ár.