Allar dopingroyndirnar negativar

Allar 20 dopingroyndirnar, sum eru tiknar í føroyskum ítrótti í ár, eru negativar.

Tað kunngerð Anti Doping Føroyar, sum júst hevur gjørt nýggja samstarvsavtalu við Anti Doping Danmark.

 - Higartil í ár hava vit tikið 20 royndir, og vit hava eina ætlan um at taka 40-50 royndir í ár, og allar hava verið negativar higartil, sigur Jónas Tór Næs, sum er formaður í nevndini hjá Anti Doping Føroyar.

Higartil eru royndirnar tiknar í inniróðri (3), rógving (6), fótbólti (4), vektlyfting (3) og í kurvabólti (4). 


Samstarvið við ADD endurnýggja

Í heyst var Anti Doping Føroyar skipað við nevnd, og ADF hevur nú ábyrgdina fyri antidoping-arbeiðnum í Føroyum.

 - Tá vit nærkaðust 2020, fann mann útav, at mann ikki hevði heimild til at viðgera persónsupplýsingarnar, sum koma úr dopingroyndunum, greiðir Jónas Tór Næs frá.

Tí mátti Løgtingið samtykkja eina lóg, sum gav heimild til at taka royndir og viðgera persónsupplýsingarnar.

Játtanin er 500.000 krónur um árið, og millum annað tí er neyðugt við samstarvi við danska antidoping myndugleikan, ADD, og tað samstarvið er júst endurnýggja í samband við vitjan hjá ADD í Føroyum í farnu viku.

 - Í mun til uppgávurnar er játtanin øgiliga lítil, og tí hava vit tørv á hjálp úr Danmark fyri at klára uppgávurnar, og tí er tað soumráðandi at hava hesa avtaluna, sigur Jónas Tór Næs.


Royndir og undirvísing

Ein av høvuðsuppgávunum hjá Anti Doping Føroyum er at taka dopingroyndir av føroyskum ítróttarfólki.

 - Og tá tað kemur at vísa seg, at ein dopingroynd er positiv, skulu vit í nevndini virka sum ákærumyndugleiki, sigur Jónas Tór Næs.

Harafturat verður alsamt størri dentur lagdur á kunning og undirvísing.

 - Tað hevur týdning, at íðkarar kenna dopingreglurnar, so teir ikki av misgávum fáa eina dopingsak ímóti sær, sum kann kosta teimum bann ella yrkisleiðina, sigur stjórin í Anti Doping Danmark, Kim Højgaard Ravn.