Samráðingarnar hjá pedagogunum byrjaðar

Sáttmálasamráðingarnar hjá Pedagogfelagnum eru byrjaðar

Í gjár handaði nevndin krøvini og fekk eisini krøv frá Kommunala arbeiðsgevarafelagnum og Fíggjarmálaráðnum.

Pedagogfelagið sigur, at tey í vár avgjørdu at geva arbeiðsgevarunum stundir at samráðast við tey feløg, hvørs sáttmálar gingu út í oktober 2022. 

Vilja ikki bíða longur

Flestu av hesum samráðingum eru  tó ikki komnar á mál, og nevndin í Pedagogfelagnum heldur ikki, at tað sømir seg at bíða longur við samráðingunum.

- Vit eru greið yvir, at fleiri av tykkum hava tørv á einum lønarlyfti her og nú, og fara vit at gera okkara fyri, at vit fáa nýggjan sáttmála skjótast gjørligt, sigur Pedagogfelagið í skrivi á heimasíðuni. 

Arbeiðsgevararnir høvdu tó ikki stundir at fara meira ítøkiliga til verka fyrr enn tann 27. september, og næsti fundur ásettur at vera tá, sigur Pedagogfelagið.