Aldargomul kunngerð um Dannebrog sett úr gildi

Ein 108 ára gomul kunngerð er sett úr gildi.

Tað er danska kunngerðin um flagging við fremmandum tjóðfløggum, ella "forbud mod at benytte fremmede nationalflag," sum kom í apríl 1915.

Hon sigur, at bara er loyvt at flagga við Dannebrog.

Undantikin eru sendiráð og konsulat og tey, sum Løgmálaráðið hevur givið loyvi til at brúka onnur fløgg enn tað danska.

Kunngerðin byggir á rundskriv frá 1854. 

Kunngerð um fløgg í Norðurlondum

Ein onnur kunngerð, sum er nakað yngri, er eisini strikað.

Tað er kunngerðin um fløggini hjá hinum Norðurlondunum.

Hon er frá 1957 og gav undantak frá kunngerðini frá 1915 um fremmand fløgg.

Tað er, at hon gav loyvi til at flagga við fløggunum hjá Finnlandi, Íslandi, Noregi og Svøríki uttan serligt loyvi.