Kunnu tosa føroyskt og grønlendskt í fólkatinginum

Formansskapurin í fólkatinginum hevur gjørt av, at politikarar kunnu tosa grønlendskt og føroyskt í fólkatinginum, men tey skulu sjálvi umseta til danskt. 

Fólkatingumboðini fáa eisini eyka talutíð til at umseta.

Eftir at grønlendska fólkatingsumboðið, Aki Matilda Høegh Dam, tíðliga í summar undir orðaskifti í fólkatinginum tosaði grønlendskt á røðarapallinum, boðaði formansskapurin frá, at arbeitt var við skipa tulkatænastu.

Men higartil hevur tó ikki verið greitt, hvussu tulkatænastan skuldi skipast.

Markus E. Olsen

Markus E. Olsen tekur sæti sum varamaður á fólkatingi í næstum, og hann æltar eisini at tosa grønlendskt á røðarapalinum. (Mynd: KNR)

Fíggjarligt ískoyti

Formansskapurin boðar í dag eisini frá, at fólkatingslimir, sum eru valdir í Føroyum og Grønlandi, fáa fíggjarligt ískoyti til at seta egnan tulk. 

Tulkurin kann eisini hjálpa teimum at kunna um arbeiðið í fólkatinginum til almenningin í Føroyum og Grønlandi, skrivar formansskapurin.

Aki-Matilda Høegh Dam er í farloyvi, tá ið fólkatingið verður sett fyrsta týsdag í oktober.

Men varafólkið hjá henni, Markus E. Olsen, hevur sagt við grønlendska kringvarið, KNR, at hann fer at tosa grønlendskt á røðarapallinum, eins og Aki Matilda gjørdi undir orðaskiftinum í mai-mánaði um ríkisfelagsskapin.

- Tað hevur týdning fyri meg at fáa boðskapin út, sum hann er, uttan at hann kann misskiljast,og tá er best at tosa mítt móðurmál, segði Markus E. Olsen við KNR.