Ráðstevna um ríkisfelagsskapin

Eru rembingar í ríkisfelagsskapinum millum Grønland, Føroyar og Danmark? Hvat er orsøkin til, at misnøgdin kemur fram ferð eftir ferð? Eru aðrir mátar hjá hesum trimum londum at skipa felagsskapin? 

Hesir eru nakrir av spurningunum, sum verða svaraðir á ráðstevnu um ríkisfelagsskapin og norðurlendska samstarvið, sum Norrøna Felagið og Fróðskaparsetrið skipa fyri í morgin.

Teir, sum svara hesum spurningum, eru m.a. Bertel Haarder, fyrrverandi fólkatingsmaður, og Michael Zilmer-Johns, fyrrverandi sendimaður fyri danska uttanríkisráðið.

Eisini koma Jens Christian Svabo Justinussen, samfelagsfrøðingur, og Bárður Larsen, løgfrøðingur, við sínum íkasti.

Pallborðskjak

Seinni verður pallborðskjak millum Aksel V. Johannesen, formann í Javnaðarflokkinum, Bárð á Steig Nielsen, formann í Sambandsflokkinum, og Bjarna Kárason Petersen, landsstýrismann norðurlandamálum.

Ráðstevnan verður í Løkshøll í Runavík í morgin frá klokkan 13 til 16.30.

Ráðstevnan er ókeypis, men neyðugt er at melda til, siga fyrireikararnir.