Skúlagongdin í morgin rakt av samhugaverkfalli

Altsamt fleiri fakfeløg lýsa nú samhugaverkfall við sjúkrarøktarfrøðingunum. 

Limirnir í Føroya Lærarafelag fara nú eisini í samhugaverkfall í morgin, og tað merkir, at eingin skúlagongd verður. 

Føroya Lærarafelag skrivar á heimasíðu felagsins í kvøld:

----

Føroya Lærarafelag lýsir samhugaverkfall frá fríggjadegnum 3. november 2023 kl. 7.00 til fríggjadagin 3. november 2023 kl. 17.00.

Fráboðan um samhugaverkfall

Nú Løgtingið ger seg inn á verkfalsrættin hjá Felagnum Føroyskir Sjúkrartøktarfrøðingar, verður við hesum boðað frá, at sáttmálasettu limir Føroya Lærarafelags fara í samhugaverkfall frá fríggjadegnum 3. november 2023 kl. 7.00 til fríggjadagin 3. november 2023 kl. 17.00.

Verkfallið er galdandi fyri limir, sum starvast í fólkaskúlanum.

Verkfallið umfatar ikki tænastumenn, skúlastjórar, varaskúlastjórar, fyrstilærarar, lærarar í forskúlum og lærarar í serflokkum.

Føroya Lærarafelag