Føroya Sjósavn var sett á stovn í 2006, við ti endamáli at sýna fram dýr og plantur, sum liva í sjónum á okkara leiðum. Føroya Sjósavn heldur til í gamla íshúsinum á Argjum.

Nú skulu vit hava nýtt framkomið sjósavn, sum væntandi fer at kosta millum 80 og 90 milliónir kr. Sjósavnið fer at rúma fjølbroyttum virksemi og skal virka sum ein altjóða vitanardepil fyri havumhvørvið í arktiska økinum.

Eldsálin Bjørki Geyti, ið setti Føroya Sjósavn á stovn, og hevur staðið á odda fyri tí øll árini hevur lagt frá sær fyri aldur. Í hansara stað er Heini Hátún settur at standa fyri arbeiðinum at projektera, byggja og reka nýggja sjósavnið.