Síðani 2017 hevur Jóhannis Danielsen, lívfrøðingur á Havstovuni, samstarva við professara úr Oxford University í Onglandi. Professarin, Tim Guilford, hevur í fleiri umførum verið í Føroyum og gjørt fuglakanningar saman við Jóhannisi. Teir hava m.a. kannað, hvussu skrápur ferðast.

Tim Guilford hevur dámt samstarvið so mikið væl, at hann nú hevur boðið Jóhannisi at vera 'vitjandi vísindafólk' á Oxford University. Har skal Jóhannis samstarva við eina granskingardeild, sum nevnist Navigational Group. Tað er serliga á sokallaðum "brain storming sessions", at tey vilja gagnnýta vitanina, sum Jóhannis Danielsen hevur um fugl og lívfrøði.

19. februar fer Jóhannis til Oxford, har hann verður í ein góðan mánað.