Grundgevingina er hann errin um og heldur hana næstan vera ov nógv av tí góða, tí har stóð millum annað:

Ein sannur mentanarberi. Eldhugaður og við ágrýtni strembar hann eftir at varðveita og greiða frá føroysku mentanini. Hann leggur alt í at endurskapa eftir gomlum siði. Á ektaðan hátt, avhendar hann ferðafólki eina uppliving av staðbundna siðaarvinum framvið sjóvarmálanum.

Hetta við siðaarvinum er týdningarmikið hjá Samson at bera víðari, og tað ger hann við fyritøku sínari boat.fo. Hann er útbúgvin fiskivinnufrøðingur, sum síðan hevur tikið ferðaleiðaraútbúgving.

- Eg havi nógvar royndir við fiskivinnu og sjógvi, og tað eru hesar, eg taki við mær, tá eg fari út við ferðafólki. Orsøkin til, at tað júst er føroyski báturin, sum eg brúki, er tann ektaða og friðarliga kenslan, sum tú fært í einum føroyskum báti.
Hetta at hava tíð er týdningarmikið hjá Samson Højgaard. Kenslan av at tað ikki skal ganga so skjótt fyri seg er partur av upplivingini, sum ferðafólk úr øllum heiminum royna, tá tey koma til Føroya - ja sjálvt á brúðarferð.