Sverri tikin út til Olympisku leikirnar

Sverri Sandberg Nielsen er tikin út til Olympisku leikirnar í París næsta summar.

Miðvingurin mannar eins og í Tokyo danska einskullaran í rógving. Tað kunngerð olympiska nevndin hjá Danmark fyrrapartin.

 - Tað eru fá, sum hava stuðul úr tveimum londum, men tað havi eg, og tað eri eg glaður fyri. Føroyingar fylgdu væl við, tá eg róði undir seinastu leikunum, og finalan lá á tjoðardegnum. Soleiðis verður aftur í ár, og eg vóni at kunna gera veitsluna so góða sum gjørligt, sigur Sverri Sandberg Nielsen við roning.fo.

 - Vit eru fegin um, at vit longu nú kunnu taka Sverra út til OL í París. Sverri er ein krútsterkur íðkari í heimsflokki, og tað verður sera spennandi at fylgja hansara roynd at vinna eitt olympiskt heiðursmerki. Vit eru vís í, at hann fer at umboða bæði Danmark og Føroyar upp á besta máta, sigur Søren Simonsen úr danska Ítróttarsambandinum.


Ein royndari rógvari

Tað var í 2021, at Sverri Sandberg Nielsen akkurát ikki rakk heiðursmerkjum í Tokyo. Miðvingurin fekk eina góða byrjan og lá eitt skifti fremst, men eftir 2000 metrum var hann yvirhálaður tríggjar ferðir - seinastu ferð mestsum á mállinjuni.

Eftir hetta valdi føroyingurin at taka ein longri steðg frá rógvingini.

 - Tað var gott at steðga á í eina tíð eftir Tokyo, sigur Sverri Sandbarg Nielsen, sum viðgongur, at hann helst var givin, um hann hevði fingið heiðursmerki ta ferðina.

 - Nú komi eg til París sum ein klókari og royndari rógvari. Eg verði betur og betur fyri, og meir og meir ferð kemur á bátin. Eg gleði meg, sigur føroyski rógvarin.