Høgtíðsgudstænasta í Vesturkirkjuni

Sóknarprestarnir, Heri Joensen og Bergur Debes Joensen, hava røkt tænastu í Suðurstreymoyar vestara prestagjaldi í 25 ár.

Heri og Bergur tóku við embætinum sum sóknarprestar tann 1. desembur í 1998, og tann 6. desembur sama ár vórðu teir skipaðir í embætið.

Heri Joensen og Bergur Debes Joensen avloystu ávikavist Kjartan Mørkøre og Høgna Poulsen, ið báðir høvdu verið prestar í Vesturkirkjuni, síðani Suðurstreymoyar vestara prestagjald kom í 1976.

- At tvær ferðir tveir sóknarprestar hava starvast í so langa tíð í einum og sama prestagjaldi ber boð um, at í prestagjaldinum er gott at vera, og at prestarnir trívast í kalli og tænastu, skrivar Fólkakirkjan.

Tríggir prestar starvast út frá Vesturkirkjuni, tí í 2010 varð Derhard Jógvansson settur sum tann triði sóknarpresturin í Suðurstreymoyar vestara prestagjaldi.