86 prosent av øllum føroyingum vilja búgva í egnum sethúsum

Hvat skapar og eyðkennir tann góða býin og ta góðu bygdina? Hvat skal til fyri at skapa trivnað á einum staði? Og hvussu vilja føroyingar helst búgva?

Alt hetta og mangt afturat verður viðgjørt í nýggju útvarpsstuttrøðini Kul faktor Føroya. Í tí sambandi er eisini umfatandi spurnarkanning gjørd. Spyr.fo stóð fyri spurnarkanningina, og 500 fólk um alt landið hava luttikið.

Og ein av høvuðsniðurstøðunum er sera greið: Føroyingar vilja búgva í egnum sethúsum. 

Í kanningini svara 86,6 prosent av teimum spurdu, at tey vilja búgva í egnum sethúsum, 7,4 prosent í eigaraíbúð, 3,4 prosent í leiguíbúð, 1,8 prosent í lutaíbúð og 0,8 prosent valdu annað.

Nýggj útvarpsstuttrøð: Kul faktor Føroya 

Í sjey pørtum leita vit eftir kul faktorum um landið: Hvat skapar og eyðkennir tann góða býin og tað góðu bygdina? Er tað ymiskt alt eftir hvar í landinum vit eru? Hvussu mennir tú tað góða staðið? Og eru nakrir felagsnevnarar galdandi uttan mun til bústað og persónliga áskoðan? Og hvørjir kul-faktorar gera seg galdandi, tá ið ein bygd ella ein býur fær góð skoðsmál, og hvønn týdning hevur tað - bæði fyri bygdina/býin, og tey, sum búgva har?

Týsdagin er fyrsta sendingina á skránni. Í fyrstu sendingini útgreina Sámal Matras Kristiansen, samfelagsfrøðingur við sergrein í býarplanlegging, og Nina Arge, arkitektur, ið eisini hevur nomið sær eftirútbúgving innan býarskipan, ymisk viðurskifti, ið kunnu gera sítt til at tryggja eitt gott stað at búgva og vera í – ella tað øvugta.

Vit vitja eisini hjúnini Katrin og Ólav Gregersen í Syðrugøtu, har ið vit skifta orð um eitt nú hvønn týdning Grót, G! Festivalur, Tøting og eldsálirnar hava havt fyri kulfaktorin í Gøtu. 

Ólavur og Katrin Gregersen

Caption: 

Hjúnini Ólavur og Katrin Gregersen eru millum gestirnar í fyrsta partinum. Tey viðgera Kul faktorin í Syðrugøtu.

Fyrsti partur verður í útvarpinum í dag klokkan 17.05, men tú kanst lurta á heimasíðu okkara longu nú.

Tú finnur sendingina her.