Kjak um serskattaskipanir

Búskaparfrøðin mælir til at strika serskattaskipanir, sum - sambært teimum - minka um arbeiðsútboðið í Føroyum. Í nýggjastu heystfrágreiðingini hjá Búskaparráðnum mælir ráðið stutt sagt til at avtaka tær. Landsstýrið lurtaði, og tá skattaumskipanin varð løgd fram í Tinganesi 3. november, vóru teir tríggir frádráttirnir settir á dagsskránna. 

Uttanlandsfrádrátturin - sum í dag er 120.000 krónur um árið, skal minkast burtur í einki eftir fimm árum. Og tað sama skal samdøgursfrádrátturin, sum ídag er 300 krónur um dagin. Fiskimannafrádrátturin, sum ídag er 65.800 krónur um árið, skal minkast niður í 42.000 krónur um árið í 2025.

Lógaruppskotið, sum nú liggur í fíggjarnevndini, møtir harðari mótstøðu. Antares, áhugafelagið fyri tey í starvi uttanlands; FFU, felagið fyri føroyskar fiskimenn uttanlands, Føroya Fiskimannafelag og Skipara- & Navigatørfelagið hava øll í hoyringsskrivi til Fíggjarnevndina givið greitt til kennar, at tey vilja varðveita serskattaskipanirnar.

Tøl frá Taks staðfesta samstundis, at hesir samfelagsbólkar - sum fáa frádráttirnar - hava millum hægstu inntøkur í samfelagnum.

Ruth Vang, landsstýriskvinna í fíggjarmálum, og Bárður Nielsen, formaður í Sambandsflokkinum, vóru í sjónvarpsstovuni at kjakast um serskattaskipanir.