Tá Annika Maisonsdóttir Mellemgaard í 2020 flutti aftur til Klaksvíkar eftir at hava búð uttanlands í fleiri ár, saknaði hon at kunna gera ítriv saman við ymiskum kvinnum í øllum aldri.

Tey frítíðartilboðini, henni dámdi, vóru ikki í Klaksvík, so hon tók av sínum eintingum stig til eitt nú gangitúrar, saunagos, dipping og annað. Í dag eru omanfyri 700 kvinnur virknar í felagsskapinum.

Fyri júst at hava tikið stig til tey ymisku ítrivini er Annika Maisonsdóttir Mellemgaard nú at finna í donsku bókini "Kvindernes og Kønsminoriteternes blå bog 2023/2024".

Fyri hana hevur tað stóran týdning, at allar kvinnur í øllum aldri hava møguleika at koma saman.

- Kvinnurnar í Klaksvík hava ikki verið so sjónligar, eins og tær eru nú. Og vit kunnu nú eina rúgvu í Klaksvík, nógv annað enn tað vanliga sum fótbólt og hondbólt, sigur Annika Maisonsdóttir Mellemgaard, sum sigur seg fáa nógv burturúr við at standa á odda fyri teimum ymisku tiltøkunum:

- Tað gevur mær eina rúgvu. Eina vælveru og eisini eina sálarliga vælveru. At kunna og sleppa at gera hesi tingini og síggja at onnur fólk blíva glað, heldur Annika Maisonsdóttir Mellemgaard fyri.

Í morgunsendingini fortelur Annika Maisonsdóttir um fyrsta hugskotið í 2020, og hvussu felagsskapurin og ítrivini hava ment seg seinastu trý árini.