Løgmansskrivstovan biðið Heilsumálaráðið um frágreiðing

Heilsumálaráðið skal geva Løgmansskrivstovuni frágreiðing um málið viðvíkjandi vantandi innliti. 

Tad upplýsir John Rajani, løgmansstjóri, í skrivligari viðmerking til Kringvarpið.

Hann sigur, at løgmaður hevur fingið avrit av einum áliti frá Løgtingsins umboðsmanni tann 4. desember. 

Álvarslig átala

Í álitinum verður ein álvarslig átala givin Heilsumálaráðnum fyri handfaringina av einum máli um vantandi innlit.

Løgmansstjórin sigur, at hann hevur heitt á aðalstjóran í Heilsumálaráðnum um at gera viðmerkingar til niðurstøðuna hjá Løgtingsins umboðsmanni. 

John Rajani leggur aftrat, at Løgtingsins umboðsmaður er ein týðandi stovnur í okkara rættarsamfelag, og tað er týdningarmikið, at landsfyrisitingin gevur Løgtingsins umboðsmanni tær upplýsingar, sum hann biður um, sigur hann.