Høvuðsstaðurin skal skilja meira burturkast

Borgarar í Tórshavnar kommunu skulu venja seg við at skilja sítt burturkast meira. Longu í januar verður nýggj skipan sett í verk, og eftir ætlan verður nýggj høll bygd til endurnýtslu og skiljing av burturkasti.

Endurnýtsluplássið er stórt á kommunalu brennistøðini á Hjalla. Men hon liggur langt burtur frá bygdum øki. Og nú skal partur av endurnýtsluni flytast nærri borgarunum. Tað merkir. at støðir verða settar upp nær matvøruhandlum, har fólk kunnu sleppa av við allan innpakning av vørum, sum vørurnar vóru keyptar í.

Ein skilji- og endurnýtslustøð skal eisini byggjast á økinum við brennistøðina á Hjalla.

Tórshavnar Kommuna hevur eisini gjørt avtalur við matvøruhandlar og heilsølur um eina skipan, har alt ov gamalt grønmeti verður savnað inn og koyrt niðan á biogassverkið Førka á Hjalla, har tað millum annað endar við at framleiða orku. Tann skipanin verður endaliga sett í verk á nýggjárinum.