Tað byrjaði fyri 10 árum síðani, tá Thurid Christiansen, sum var ættað úr Árnafirði, men búði í Sandavági, fegin vildi gera - og geva kirkjuni altardúkin. Thurid gjørdist tíverri sjúk, og tí helt Sofía Jacobsen í Sandavági áfram at brodera altardúkin, og nú hevur Paulina M. K. Eliasen á Syðradali gjørt hann lidnan.

Altardúkurin er gáva til kirkjuna.

Hesin altardúkurin er broderaður við hardangerseyming. Myndevnini eru krossur og bikar. Mynstrið er mest nýtta til altardúkar í Føroyum, tí sambært skrásetingunum úr bókini Kirkjuklæði, sum kom út í 2020, vóru tá 24 tílíkir dúkar. Tó er ymiskt, hvussu hornini eru broderað í sambandi við longd av altarinum.

Elsti altardúkurin, ið er broderaður við hesum mynstrinum, er frá um leið 1900 og var í gomlu kirkjuni í Klaksvík.

kelda: folkakirkjan.fo