Nýggja battarískipanin á Sundi orsøk til streymslit

Um hálvgum fýra tíðina í nátt fór streymurin í meginøkinum aftur. Tað hendi eisini síðsta fríggjadag.

Orsøkin til streymslitið er nýggja battarískipanin hjá SEV á Sundi. 

"Nýggja battarískipanin á Sundi steðgaði upp av ókendari orsøk, og tað var orsøkin til, at fólk í meginøkinum mistu streymin um hálvgum fýra tíðina í nátt," sigur Terji Nielsen, menningarleiðari í SEV. 

Terji Nielsen

Battarískipanin er nú sløkt, og SEV er í samskifti við veitaran um trupulleikan. 

"Vit síggja í nátt, at tað er nógvur vindur inni á netinum, men tá ið vindurin brádliga blívur vekk, og battarískipanin skal taka yvir, tá koplar skipanin úr. Tað er júst tað, ið hon ikki skal, tí hon skal tryggja streymveitingina, tá ið vindurin brádliga blívur burtur," greiðir Terji Nielsen frá. 

Húsahagi, Vindmyllur

Líknandi skipan í Suðuroy riggar

Skipanin á Sundi varð sett í verk 8. desembur, og hon skal tryggja, at tað kemur so nógv grøn orka inn á netið hjá SEV sum gjørligt. 

Í Suðuroy er skipan av sama slag, og hon riggar frágerða væl. 

"Battarískipanin skal vera við til at tryggja, at vit fáa so nógv grøna og bíliga orku inn á skipanina, og tí er tað eitt øgiliga týdningarmikið stig, ið SEV hevur tikið við at keypa hesa battarískipan,"

Terji Nielsen, menningarleiðari í SEV, staðfestir, at battarískipanin er roynd væl og virðiliga, áðrenn hon bleiv sett í gongd. Men hann ásannar, at tað er óheppið, at stórir partar av landinum liggja í streymloysi fleiri ferðir um vikuna.