Mótstøðuliðini vera Slovenia, Noreg og Póland, og uppgávan kann tykjast stór, men øll orka undir fyrireikingunum í hesum døgum verður løgd í fyrsta dystin móti Slovenia. Hinar dystirnar fer hópurin at savna seg um seinni, sigur annar av venjarunum, Julian Johansen.

- Vit eru underdogs, og skulu vit gera nakran mun, skulu vit raka væl á degnum. Vit hava fokus á dystinum móti Slovenia, tí henda uppgáva er hin fyrsta og tí hin týdningarmesta beint nú. Vit fara all-in niður til Týsklands at klára okkum so væl sum gjørligt móti Slovenia, og vóna at vit við okkara gløggu spælarum og einum sindri av hepni kunnu skapa eitt gott úrslit móti teimum.

Ein av leikarunum í hopinum er Ísak Vedesbøl. Ísak er einasti leikari, sum spælir hondbólt í Føroyum, meðan allir hinir spæla í øðrum londum og tí á einum øðrum støði enn tí, hann kennir úr Føroyum.

- Tað er sera gevandi hjá mær at venja saman við teimum, tá landsliðsvenjingar eru, tí teir spæla í stórum kappingum, og har er nógv eg kann læra frá millum annað Hákun West av Teigum, sum spælir í Füchse Berlin, sigur Ísak Vedesbøl.

Av tí at hann spælir í Berlin, er upplagt at spyrja Hákun, hvat føroyingar kunnu vænta, tá teir í túsundatali koma til dyst í Mercedes Benz Arena.

- Nú er eitt EM endaspæl ikki heilt tað sama sum ein heimadystur í týsku hondbóltsdeildini, tí har eru ikki so nógvir heimaáskoðarar, men vit vita, at har koma sera nógvir føroyskir áskoðarar, so eg ivist ikki í at stemningurin verður góður, og tað er nakað, vit gleða okkum nógv til, sigur Hákun.

Fyrsti dysturin hjá føroyska hondbóltsliðnum hjá monnum verður spældur í Mercedes Benz Arena hósdagin 11. januar.