Partabrøvini í Smyril Line eru framvegis ikki seld

Landsstýrið kom ikki á mál við at selja síni partabrøv í Smyril Line í fjør.

Á fíggjarlógini fyri 2023 stóð sølan at geva 79 milliónir í inntøku. Tann inntøkan kemur ikki, og hallið verður tí samsvarandi størri, tá landsroknskapurin fyri 2023 skal gerast upp. 

Í heyst boðaði Løgmansskrivstovan annars frá, at ætlanin var avgreiða søluna í endanum av november.

Glyvursnes, farmaskip

Nýggjasta farmaskipið hjá Smyril Line, Glyvursnes, kom fyrstu ferð á Havnina nýggjársaftan. (Mynd: Smyril Line)

Men nú upplýsir Løgmansskrivstovan, at sølan er avgreidd enn.

Fleiri upplýsingar kunnu skaða sølutilgongdina, siga tey.

Løgtingið hevur samtykt at selja partabrøv í 2023. Nú farið er inn í eitt nýtt álmanakkaár, verður eisini neyðugt við nýggjari heimild, antin við eykajáttanarlóg ella við tilsøgn frá fíggjarnevndini.

Landsstýrið eigur góð 16 prosent av partabrøvunum í Smyril Line.