- Eg havi aldrin upplivað nakað líknandi

 - Har fara so nógvir tankar ígjøgnum høvdið, men tú mást bara sleppa tí og njóta, at ølirnar flúgva úti á áskoðaraplássunum. Tú roynir bara at vera í løtuni, og hon er fantastisk beint nú.

Soleiðis segði Helgi Hildarson Hoydal, eina lítla løtu eftir ótrúliga 26-26 javnleikin ímóti hondbóltsrisunum úr Norra. Strikuspælarin varð ikki úttikin til EM-hópin, men seinni varð hann kallaður inn sum 19. maður.

 - Eg havi aldrin upplivað nakað líknandi, og eg veit ikki, um eg fari at gera tað aftur, segði ein av royndu monnunum á føroyska liðnum.

Hann rósti teimum umleið 5.000 føroysku viðhaldsfólkunum, sum aftur í dag settu lit á ljóð á Mercedes Benz-Arena, og áttu sín part í søguliga úrslitinum.

 - Tey duga at leggja trýst á dómararnar, tá tað er neyðugt, og tú sært, at norðmenn eru eisini skakaðir av tí. Ein heilt sublimur innsatsur frá føroysku áskoðarunum.