Rosebank dryppar á føroyingar

Um tvey ár fer Equinor, sum er fyrrverandi Statoil, at bora eftir olju og gassi beint við føroyska markið. Føroyskir tænastuveitarar vóna, at tað eisini fer at dryppa á teir úr milliardaíløguni.

Oljufelagið Equinor fer nú at fáa oljuna og gassið í Rosebank oljubrunnin upp og byrja framleiðslu. Brunnurin liggur bara 15 kilometrar frá føroyska markinum. 

Tað er Føroya orku og ídnaðarbólkur sum saman við Sjóvinnufelagnum, ið hava boðið Arna Gürtner, stjóra í Equinor, og Jákup Øregaard, sum stendur á odda fyri boringunum hjá felagnum uttan fyri Norra, til Føroya at greiða møguligum føroyskum tænastuveitarum frá ætlanunum á Rosebank feltinum.

Nógv vinnulívsfólk vóru í dag á Hotel Hilton og lurtaðu.

Rosebankbrunnurin varð funnin í 2004. Í 2026 er ætlanin at framleiða. Í brunninum er mett at vera 300 milliónir tunnur av olju. Væntað verður, at framleitt verður næstu 25 árini.

Oddafólkini í Equinor vilja ikki gera samrøðu við fjølmiðlar um ætlanirnar.