Hagtøl vísa, at tað ofta er í januar, at pør fara hvør til sítt.

Orsøkirnar kunnu vera fleiri.

Tað heldur Margret Mortensen, sum er psykoterapeutur og parterapeutur.

- Summi velja at bíða við tí truplu avgerðini til jól og nýggjár er farið framvið, soleiðis at mann ikki oyðileggur ta tíðina, sum eigur at vera so góð, sigur Margret Mortensen og leggur afturat, at ofta vilja pør av stórar dagar vekk av vegnum, áðrenn tey taka stigið at fara hvør til sítt.

Sambært henni er ein orsøk, at pør fara frá hvørjum øðrum, ofta tann, at tey ikki hava raðfest parlagið.

- Tey arbeiða nógv, hava fleiri frítíðarítriv og hava eisini børn at skula taka sær av. Og uttan at hugsa um tað, so raðfesta tey ikki parlagið, sigur Margret Mortensen.

Hon leggur dent á, at tað at raðfesta parlagið ikki snýr seg um hotelluppihald ella vitjanir á flottum matstovum.

- Tað snýr seg um at vera saman, geva tíð til hvørtannað. Bara til dømis at seta seg niður og drekka ein kaffimunn saman og práta, sigur Margret Mortensen.

Í morgunsendingini kemur hon við ráðum til tað góða parlagið.