Oline helt ikki nógv um undirvísingina hon fekk í framhaldsdeildini, tá tað snúið seg um mannarættindi, og í staðin fyri at seta seg afturá og suffa um tað, fór hon undir at gera undirvísingartilfar á føroyskum.

Úrslitið gjørdist ein bóklingur, sum er 52 síður til longdar, og sum skúlar kunnu fáa ókeypis til sínar næmingar, og sum Oline sjálv hevur gjørt úr enda í annan. Hon hevur leitað sær kunning, skrivað og myndprýtt, og so hevur hon eisini skaffað sær fígging til útgávuna.

- Tað er týdningarmikið at læra um hesi evni, tí tey kunnu geva okkum eina grundfatan av mannarættindum, og gera okkum før fyri at luttaka í føroyska manarættindakjakinum, sigur 18 ára gamla Oline Lykke Grand, sum nú kann kalla seg rithøvund.