Í løtuni verður nógv tosað um gagnligu árinini, sum kuldi og hiti kunnu geva okkum.

Ein tann fremsti granskarin á hesum øki er Susanna Søberg, PhD. Hon hevur eitt nú verið gestur í gitna poddvarpinum hjá Andrew Huberman, og Joe Rogan nevnir regluliga hennara gransking í sínum poddvarpi.

Sambært Susanna Søberg er eingin ivi um, at tað er gagnligt og beinleiðis heilsufremjandi at lata kroppin uppliva veruligan kulda og hita, sum til dømis ísbað og sauna.

- Granskingin vísir, at tað hevur fyrimunir at aktivera tað brúna feitti. Hetta er sunt feitt, sum er við til at seta forbrenningina upp og við til at styrkja immunverjuna. Og brúna feittið verður sett í gongd at arbeiða, tá kroppurin blívur ordiliga kaldur ella ordiliga heitur í eitt stutt tíðarskeið, fortelur Susanna Søberg.

Í morgunsendingini greiðir viðurkendi granskarin frá fyrimunum við eitt nú dypping, ísbaði og sauna og vísir á úrslitini, hon er komin fram til í sínari gransing á hesum økinum.