Treytirnar hjá Bústøðum vera ikki broyttar

Í løtuni verður ikki mett at vera neyðugt at broyta treytirnar hjá Bústøðum, so fólk, sum ikki longu eiga bústað, sleppa framum á bíðilistanum hjá Bústøðum.

Eisini er ivasamt, um tað er skynsamt at brúka meiri arbeiðsorku og umsiting til at útvega fleiri upplýsingar um leigarar og hava eftirlit við teimum. 

Heldur eigur arbeiðsorkan at vera brúkt til at fáa fleiri bústaðir. 

Tað sigur Ingilín D. Strøm, landsstýriskvinna.

Hon hevur svarað Sólvit E. Nolsø, løgtingsmanni,um bíðilistan hjá Bústøðum.

Nógv bíða

Bústaðir halda ikki, tað kemur ofta fyri, at fólk leiga út hús samstundis sum tey búgva í íbúð hjá Bústøðum, sigur landsstýriskvinnan. 

Hon sigur, at í heyst kemur landsstýrið við uppskotum um bústaðarskyldu í nýggjum útstykkingum og tænastugjald á tóm hús. 

22.januar í ár vóru 3.003 limir í Bústøðum.

2.011 vóru skásettir sum býlissøkjandi, 534 vóru hvílandi limir, 458 vóru skrásettir sum leigarar.

Frá 9.januar í fjør til 22.januar í ár fóru 79 av listanum við býlissøkjandi.