Leigarar hjá Bústøðum rópa varskó

Fyrr í vikuni boðaði Búðstaðir leigarum frá, at leigan fyri íbúðina, sum tey leiga, fer upp í summar.

Fyri Tanyu Møller, sum er stakur uppihaldari, og hevur leigað frá bústøðum í eitt ár, hevur hækkanin við sær, at hon noyðist at siga íbúðina frá sær og finna okkurt annað, sum er bíligari.

Á Biskopstorgi í Klaksvík er støðan tann sama - har hava leigarar eisini fingið boð um, at leigan fer upp.

Bente Thomsen, maðurin og teirra trý børn, hava leigað íbúð frá Bústøðum í fýra ár. Hesi fýra árini er leigan økt fyri hvørt ár. Samanborið við tá tey fluttu inn, fyri fýra árum síðan, skulu tey nú gjalda knappar 20.000,- meir um árið í leigu.

Orsøkina til hækkingina í húsaleiguni, sigur Bústaðir í brævi til leigararnar verða: at leigan sum meginregla er grundað á broytingina í brúkaraprístalinum seinastu trý árini.

Men, hesa grundgeving eru hvørki Tanya Møller ella Bente Thomsen nøgdar við.

Boðini frá Bústøðum um, at leigan aftur økist, fekk íbúgvarnar á Biskopstorgi at møtast fyrr í vikuni. Hóast fjølbroytt, standa øll eftir við somu kenslu; tey eru ikki nøgd og kenna seg antin noydd at flyta ella fastlæst.