Súni Selfoss vil hava mismunarlógina samtykta

- Vit eru í einum sáttmálasamráðingarári. Allir fimm sáttmálarnir hjá felagnum ganga út í ár. 

Tað sigur endurvaldi formaðurin í Starvsfelagnum, Súni Selfoss.

Hann varð endurvaldur á aðalfundinum hjá Starvsfelagnum í gjár og heldur sostatt fram í formanssessinum næstu fýra árini.

Formaðurin sigur, at nógv er á skránni næstu árini.

Hann vil millum annað fáa mismunarlógina samtykta í løgtinginum. 

Í grein í Starvsblaðnum nevnir Súni Selfoss tvær kanningar, sum felagið gjørdi í fjør.

Tann eina kanningin vísti, at fimti hvør hevði upplivað happing á arbeiðsplássinum.

- Hetta eru skelkandi tøl. Eg haldi vit hava eina keðiliga mentan á arbeiðsplássunum, sum vit mugu fáa um rótina á. Eg vóni at limir hjá okkum og øll onnur úti á almenna arbeiðsmarknaðinum kunnu hjálpa okkum við at basa. 

Formaðurin hevur lagt kanningina fram á fleiri arbeiðsplássum og starvsfólk og leiðslur hava kjakast um hana. 

- Vit mugu saman við leiðslunum á stovnunum, sáttmálapørtum og ikki minst Arbeiðs-og brunaeftirlitinum fáa gjørt eina ætlan um, hvussu vit basa hesum, sigur Súni Selfoss. 

Súni Selfoss bleiv formaður í Starvsfelagnum fyrstu ferð í 2016 og viðtøkurnar fyri Starvsfelagið siga, at forfólk kann í mesta lagi sita trý valskeið samanhangandi.