Undirskrivað sáttmála um turrdokk á Skála

Í gjár skrivaðu Mouritz Mohr, stjóri í Mest, Petur Háberg, nevndarformaður, og Tórbjørn Jacobsen, borgarstjóri, undir avtalu um ætlan at gera nýggja turrdokk og at byggja út havnarlagið á Skála. Tað skrivar heimasíðan hjá Runavíkar kommunu.

Talan er um fyribils avtalu um framtíðar skyldur, ið verður brúkt sum útgangsstøði undir einum leigusáttmála fyri økið, sum partarnir fara at gera sínámillum, tá sundurmatrikulering o.a. er avgreitt.

Taka størri skip

Við nýggju turrdokkini kunnu munandi størri skip takast upp á Skála. Nýggj bryggja verður gjørd eystari enn tann, sum nú er, so at skip sum stinga upp til 12 metrar kunnu liggja við bryggju - framvið atløgusíðuni og í dokkini.

Men fyrst skulu avvarðandi myndugleikar góðkenna verkætlanina.