Danskir krabbameinssjúklingar liva longur

Fólk, sum hava fingið staðfest krabbamein, liva nógv longur nú enn fyrr.

Tað vísir nýggj frágreiðing hjá danska heilsustýrinum, sum hevur hugt at donskum krabbameinssjúklingum og hvussu leingi, tey liva.

Tølini eru frá 2008-2022.

Í hesum tíðarskeiðnum verður staðfest, at 84 prosent av kvinnunum eru á lívi eitt ár eftir, at tær hava fingið staðfest krabbamein. Vøksturin er sjey prosent.

Hjá monnunum liva 83 prosent eitt ár eftir, at teir hava fingið staðfest krabba. Fyrr var talið 75 prosent.

Tølini geva eisini eina ábending um, hvussu nógv eru á lívi fimm ár eftir, at tey hava fingið staðfest sjúkuna.

Hjá kvinnunum eru tað 70 prosent og hjá monnunum 67 prosent, sum eru á lívi fimm ár eftir, at sjúkan er staðfest. 

Í tíðarskeiðnum 2008-2010 vóru tølini ávikavist 62 og 59 prosent.