Ísrael bumbar nú Rafah

Ísraelska verjumálaráðið váttar fyri altjóða tíðindastovum, at tey í løtuni eru í gongd við miðvís álop í eystara parti av býnum Rafah, har suðuri í Gasageiranum.

Tað eru annars fáir tímar síðani, at Hamas boðaði frá, at tey taka undir við at leggja vápnini og at útflýggja gíslar til Ísrael. Tað vóru Katar og Egyptaland, sum høvdu snikkað saman eitt uppskot til eina avtalu um vápnahvíld. Hetta hendi eftir drúgvar tingingar, har USA eisini hevur luttikið.

Ein ísraelskur hernaðartalsmaður sigur við tíðindastovuna Reuters, at øll uppskot um at leyslata ísraelskar gíslar í Gasa verða viðgjørd í størsta álvara, men at hernaðarliga virksemið í Gasa kortini heldur fram.

Fyrr í dag tveitti ísraelski herurin flogseðlar niður yvir Rafah. Boðini vóru, at fólk skuldu flýggja, tí tey eru ikki trygg har longur. Ísrael hevur nevniliga fleiri ferðir nevnt, at tey ætla sær at gera innrás í Rafah, sum verður mettur at vera seinasti veruligi skansin hjá Hamas.

Ísraelski undiradmiralurin, Daniel Hagari, sigur við Reuters tíðindastovuna, at hernaðaratgerðirnar ímóti Hamas halda fram, hóast allir møguleikar fyri at fáa gíslar leyslatnar sjálvsagt verða kannaðir.

Enn er Ísrael ikki farið undir innrásina, men bumbar tó kortini í løtuni í eystara parti av Rafah.