Neyðhjálp sleppur nú aftur inn í Gasageiran

Ísrael hevur latið marknaliðið upp við Kerem Shalom inn í Gasageiran.

Lastbilar við humaniterari hjálp úr Egyptalandi fara nú um marknaliðið, skrivar Reuters.

Marknaliðið var stongt sunnudagin eftir palestinsk álop í økinum.

- Støðan hjá fólkinum í Rafah er ein vanlukka. Meira enn ein millión fólk hava leitað sær skjól í økinum.

Tað sigur Julia Råvad, greiningarstjóri í felagnum fyri Læknar uttan landamørk:

USA helt bumbum aftur

USA helt í síðstu viku aftur eini sending við bumbum til Ísraels, tí stúrt var fyri, at Ísrael fór undir stórálop á Rafah, skrivar AP.

Tíðindastovan hevur fingið upplýsingarnar frá leiðandi embætisfólki í umsitingini hjá Biden, forseta.

Heimasíðan Axios fekk um vikuskiftið líknandi upplýsingar frá ónevndum ísraelskum embætisfólkum. 

Sambært Axios, er tað fyrstu ferð síðani álopið hjá yvirgangsfelagsskapinum Hamas á Ísrael 7. oktober í fjør, at USA hevur steðgað vápnaflutningi til ísraelska herin.

Keldan sigur við AP, at eingin endalig avgerð er tikin, um bumburnar yvirhøvur verða sendar Ísrael. 

Politico og AFP-tíðindastovan skriva eisini, at veitingin er hildin aftur.