Joe Biden: Tekur ikki undir við, at Ísrael ger innrás í Rafah

Um Ísrael fremur álop á Rafah, verður tað uttan amerikanskar bumbur og granatir.

Tað sigur Joe Biden, amerikanskur forseti, sum eisini viðgongur, at amerikansk vápn hava kosta sivilum lívið í Gasa.

Tað sigur hann í eini samrøðu við CNN, har hann leggur dent á, at hann ikki vil hava, at Ísrael ger innrás í býin Rafah, sum liggur sunnaliga í Gasa, har yvir eina millión fólk halda til.

Í gjár váttaði amerikanski verjumálaráðharrin, Lloyd Austin, at USA fyribils hevur steðgað vápnaútflutninginum til Ísrael.

Og í samrøðuni við CNN sigur Joe Biden altso, at nú er nokk. Sambært forsetanum heldur USA uppat við at senda bumbur og granatir, sum kunnu brúkast í eini innrás í Rafah, um Ísrael leypur á, skrivar danska kringvarpið.