Havsbrún fingið góðkenning til at koyra grót á sjógv

Havsbrún hevur fingið umhvørvisgóðkenning frá Umhvøvisstovuni til at fylla grót á sjógv í sambandi við, at havnarlagið í Fuglafirði skal byggjast út.

Ætlanin er at víðka verandi bryggju í Fuglafirði 10.000 fermetrar út frá verandi bryggju.

Til hesa útfyllingina skulu brúkast 230.000 rúmmetrar av gróti. 

Nýggja havnarøkið skal brúkast til tvær størri goymslur og 300 metrar av nýggjum kaikanti. 

Grótið til útfyllingina kemur úr frysti- og goymslutunlum, sum Havsbrún og Bergfrost ætla at gera í Fuglafirði.

Avgerðin um umhvørvisgóðkenningina kann kærast til landsstýriskvinnuna í umhvørvismálum í seinasta lagi 27. juni.